Mae tri o brif bartneriaid iechyd Caerdydd yn ymuno i greu partneriaeth unigryw newydd sydd wedi’i chynllunio i wella canlyniadau iechyd, ysgogi arloesedd, a chreu manteision parhaol i gleifion.

Bydd Partneriaid Iechyd Caerdydd (CHP) yn gweld Prifysgol Caerdydd, Bwrdd Iechyd Prifysgol Caerdydd a’r Fro ac Ymddiriedolaeth GIG Prifysgol Felindre yn dod ynghyd yn ffurfiol i gryfhau darpariaeth gofal iechyd, meithrin rhagoriaeth ymchwil, twf economaidd, a lles cymdeithasol ar draws y brifddinas a rhanbarth ehangach De-ddwyrain Cymru.

Disgwylir i’r bartneriaeth newydd gyfrannu o leiaf £840 miliwn i’r economi dros y degawd nesaf a chreu miloedd o swyddi medrus ym maes gwyddorau bywyd.

Bydd hefyd yn agor cyfleoedd newydd i gydweithwyr weithio ar y cyd ar draws meysydd ymchwil, gofal clinigol ac addysg, cael mynediad at brosiectau arloesol sy’n gwella canlyniadau cleifion yn uniongyrchol, a datblygu sgiliau newydd sy’n gyrru arloesedd sydd o fudd i gleifion, cymunedau a’r boblogaeth ehangach ledled Cymru a thu hwnt.

Bydd ffocws cychwynnol Partneriaid Iechyd Caerdydd ar gryfderau cystadleuol a gydnabyddir yn fyd-eang gan gynnwys Canser, Therapïau’r Ymennydd, a Meddygaeth Fanwl. Mae Partneriaeth Ymchwil Canser Caerdydd yn rhan o faes thematig canser ac mae’r cydlyniad hwn yn gyfle cyffrous i PYCC ehangu ymhellach fyth.

Bydd y tri phartner yn cysylltu asedau a galluoedd ar draws y bartneriaeth i brofion a llwybrau cydlynol. Y gobaith yw y bydd hyn yn helpu i leihau rhwystrau trwy lywodraethu a rennir, cyflwyno ymchwil symlach, a mynediad at ddata ffederal.

Ewch i wefan Partneriaid Iechyd Caerdydd